«Կանայք և գլոբալ անվտանգային ճարտարապետությունը» մտակենտրոնը (ԿԳԱՃ), «Համապարփակ անվտանգություն և դիմակայունություն» ծրագրի շրջանակում, հունիսի 6-ին և 7-ին, ք.Երևանում հյուրընկալել է «Համապարփակ անվտանգություն և դիմակայունություն» խորագիրը կրող միջազգային գիտաժողովը։
Գիտաժողովի նպատակն էր աջակցել Հայաստանի Հանրապետության համապարփակ անվտանգության և պաշտպանության համակարգի կիրարկմանը՝ դրա տարբեր բաղադրիչների շուրջ ներհայաստանյան հանրային և մասնագիտական դիսկուրսի խթանման, ինչպես նաև՝ ֆիննական, էստոնական և շվեդական փորձառության վերաբերյալ հանրային իրազեկվածության բարձրացման միջոցով: Գիտաժողովի բացման և ողջույնի խոսքով հանդես են եկել «Կանայք և գլոբալ անվտանգային ճարտարապետությունը» մտակենտրոնի (ԿԳԱՃ) հիմնադիր նախագահ Արմինե Մարգարյանը, Շվեդիայի Թագավորությունում, Ֆինլանդիայի Հանրապետությունում, Նորվեգիայի Թագավորությունում, Իսլանդիայում և Դանիայի Թագավորությունում Հայաստանի Հանրապետության արտակարգ և լիազոր դեսպան Ն.Գ. տիկին Աննա Աղաջանյանը, Հայաստանի Հանրապետությունում Ֆինլանդիայի Հանրապետության արտակարգ և լիազոր դեսպան Ն.Գ. տիկին Կիրստի Նարինենը, Հայաստանի Հանրապետությունում Էստոնիայի Հանրապետության արտակարգ և լիազոր դեսպան Ն.Գ. տիկին Ռինա Կալյուրանդը և Հայաստանի Հանրապետությունում Շվեդիայի Թագավորության արտակարգ և լիազոր դեսպան Ն.Գ. պարոն Պատրիկ Սվենսոնը: Երկօրյա գիտաժողովի ընթացքում Հայաստանի Հանրապետության վարչապետի գրասենյակի, Պաշտպանության նախարարության, Գլխավոր շտաբի, Հայաստանում Եվրոպական միության առաքելության ներակայացուցիչների, ինչպես նաև հայ, ֆինն, էստոնացի և շվեդ փորձագետների, ուղեղային կենտրոնների ներկայացուցիչների մասնակցությամբ տեղի են ունեցել 6 պանելային քննարկումներ: Դրանք վերաբերել են ժամանակակից պատերազմներին, ժողովրդավարությանը՝ Համապարփակ անվտանգության և պաշտպանության համակարգի ներդրման և կիրարկման համատեքստում, ինչպես նաև՝ ռազմամարզական միավորումների, պահեստազորի և տարածքային ուժերի, մասնավոր սեկտորի, թվային տիրույթի և ռազմավարական հաղորդակցության մանրամասներին՝ Համապարփակ անվտանգության և պաշտպանության համակարգում: Գիտաժողովի առաջին օրը բաց էր զանգվածային լրատվության միջոցների լուսաբանման համար, իսկ երկրորդ օրն անցկացվել է Չաթեմ հաուզի կանոնի համաձայն: Գիտաժողովն անցկացվել է Հայաստանի Հանրապետությունում Ֆինլանդիայի Հանրապետության (նստավայրը՝ Հելսինկի), Էստոնիայի Հանարապետության (նստավայրը՝ Թբլիսի) և Շվեդիայի Թագավորության (նստավայրը՝ Երևան) դեսպանությունների ֆինանսական աջակցությամբ:
